Partner Group-un hüquqi və vergi yanaşmasına görə, bu mexanizmin praktiki mahiyyəti ondan ibarətdir ki,
topdansatış əməliyyatı üzrə güzəşt hüququ fəaliyyətin faktiki iqtisadi coğrafiyası və alıcı statusu ilə birlikdə qiymətləndirilir.
Yəni qanunvericilik burada formal qeydiyyatdan daha çox, fəaliyyətin real olaraq Naxçıvan iqtisadi mühitinə xidmət edib-etmədiyini əsas götürür.

Başqa sözlə, sahibkar Naxçıvan MR-də qeydiyyatda olsa da, əgər topdansatış qaydasında təqdim etdiyi malların alıcıları
Naxçıvan MR rezidenti deyilsə, həmin fəaliyyət üzrə güzəşt rejiminin tətbiqi üçün tələb olunan əsas şərt pozulmuş sayılır.
Bu isə vergi planlamasında ən çox diqqətdən yayınan məqamlardan biridir. Kağız üzərində rezidentlik bəzən kifayət edir kimi görünür,
amma qanun faktiki əməliyyatın istiqamətinə də baxır — vergi burada romantik deyil, sənəd sevir.

Mövcud rejim çərçivəsində Naxçıvan Muxtar Respublikasının rezidenti olan vergi ödəyicilərinə
mənfəət (gəlir), əmlak, torpaq və sadələşdirilmiş vergi üzrə azadolmalar tətbiq olunur.
Bundan əlavə, dividend gəlirləri üzrə azadolma, eləcə də müəyyən hallarda
idxalda ƏDV-dən azadolma mexanizmi də nəzərdə tutulub. Lakin bu imkanlar bütün fəaliyyət sahələrinə eyni qaydada şamil edilmir.

Xüsusilə neft-qaz sektoru, maliyyə xidmətləri, yükdaşıma fəaliyyəti və
dövlət büdcəsi vəsaiti hesabına mal, iş və xidmət təqdim edən bəzi podratçılar bu rejimdən kənarda qalırlar.
Bu səbəbdən sahibkar üçün düzgün yanaşma yalnız “güzəşt var” deyib rahatlaşmaq yox,
fəaliyyət kodunun, təqdimat istiqamətinin, müqavilə tərəflərinin və uçot sənədlərinin ayrıca yoxlanılmasıdır.

Sosial ödənişlər baxımından da Naxçıvan rezidentləri üçün əlavə təşviq mexanizmləri mövcuddur.
Xüsusilə fərdi sahibkarlar və bəzi istehsal-emal fəaliyyəti subyektləri üçün
məcburi dövlət sosial sığorta haqlarının subsidiyalaşdırılması biznes yükünün azalmasına birbaşa təsir edir.
Bu isə güzəşti sadəcə vergi üstünlüyü yox, həm də əməliyyat xərclərinin optimallaşdırılması aləti kimi ön plana çıxarır.